АСТАНА ҚАЛАСЫНДА РЕСПУБЛИКАЛЫҚ БАЛАЛАРДЫҢ ҚҰҚЫҚТАРЫН ҚАМТАМАСЫЗ ЕТУ МӘСЕЛЕЛЕРІ ЖӨНІНДЕГІ БАЛАЛАР ӨКІЛДІКТЕРІНІҢ КЕЗДЕСУІ ӨТТІ

Қазақстан Республикасы Оқу-ағарту министрлігінің Балалардың құқықтарын қорғау комитеті Балалар жылын аяқтау іс-шарасын оффлайн форматта Қазақстан Республикасы Оқу-ағарту министрі А.Аймағамбетовтың қатысуымен өткізді. 

7-9 желтоқсан аралығында өткен іс-шараларға Республиканың әр өңірінен 40 бала өкілі қатысты. Соның ішінде Шымкент қаласынан мектебіміздің 11 “Е” сынып оқушысы Шерездан Нұрдәулет қатысты.

Үш күндік іс-шаралар бағдарламасына сәйкес  “Ұлттық кітапхананың” конференц-залында “Қазақстан Республикасындағы бала құқықтары: қорғаудың жаңа тетіктерін енгізу” тақырыбында ҚР Оқу-ағарту министрі Асхат Аймағамбетов балалар өкілдіктерінің Республикалық кеңесімен кездесті.

“Radisson Hotel Astana” конференц-залында Халықаралық сарапшылардың қатысуымен “Қазақстандағы Балалар жылы: Балалардың құқықтарын қорғау саласындағы өзекті мәселелер, түйінді сын-қатерлер мен мүмкіндіктер” конференциясы өтті. 

Балалар өкілдерімен қатар конференцияға балалар құқықтары жөніндегі өңірлік уәкілдер, БҰҰ-ның Бала құқықтары жөніндегі өкілдері, Қазақстандағы БҰҰ Балалар қоры (ЮНИСЕФ), Білім басқармаларының басшылары, кәмелетке толмағандар істері жөніндегі комиссиялардың хатшылары, Парламент, үкіметтік емес ұйымдар, педагогтер мен ата-аналар қатысты.

Конференция Білім министрі Асхат Аймағамбетовтың құттықтау сөзімен басталып, министр Балалар жылы аясында атқарылған жұмыстар мен балалық шақтың өзекті мәселелерін шешудегі одан әрі жүзеге асырылатын іс-қимылдар мен тәсілдерді қарастырып, Қазақстандағы Балалар жылын қорытындылады.

Чехия, Хорватия, Венгрия, Қырғызстан және басқа елдердің Халықаралық сарапшылары балалардың құқықтарын қорғау аясында өз іс-тәжірибелерімен бөлісіп, балалардың мүдделерін қорғауды қамтамасыз ету және олардың әл-ауқатын арттыруға бағытталған қадамдармен бөлісті. 

Балалар жылын қорытындылау аясында үш күнге жоспарланған кездесу мен конференциядан бөлек оқушылар мен жетекшілерге арналған “Ұлттық академиялық кітапханасына”, Астана қаласының Басты мешітіне, жеңіл атлетикалық спорт кешеніне, “Елбасы мұражайына”, “КАЗМЕДИА” телевизиялық орталығына, “Бәйтерекке” экскурсия және Қ.Қуанышбаев атындағы академиялық қазақ музыкалық драма театрында “Алғашқы қоңырау” комедиялық сахналандырылған қойылымға бару ұйымдастырылды. 

Керемет көңіл-күйде, жағымды эмоциялық атмосферада, позитивті әсерде өткен іс-шаралардың нәтижесінде балалар көптеген қызықты естеліктерді арқалап қайтты.